5 نصائح لترك انطباع مميز عنك لل HR اثناء المقابلة الشخصية
46114 مشاهدة
5 نصائح لترك انطباع مميز عنك لل HR اثناء المقابلة الشخصية
أكثر من 70% من مسؤولي الموارد البشرية بياخدوا قرارهم المبدئي بخصوص المرشح خلال أول 5 دقايق فقط من المقابلة الشخصية!يعني كل ثانية في البداية ليها وزن كبير، وكل تصرف بيأثر في قرارهم.
لو نفسك تسيب انطباع مميز وتزود فرص قبولك في أي وظيفة أو تدريب، اتبع الخطوات اللي هنشرحها دلوقتي:
1- مظهرك الخارجي بيحكي عنك كتير
أول حاجة بيتشاف بيها الشخص هي مظهره ولبسه. لازم تكون مهيأ بشكل مناسب يعكس جديتك:يفضل تلبس Formal أو Smart Casual على الأقل حسب طبيعة الشركة.
ركز في تنسيق الألوان ونظافة الملابس والحذاء.
لو شعرك طويل أو دقنك كبيرة، خليهم مهندمين ونظيفين.
مظهرك مش مجرد لبس، ده بيقول للـ HR إنك محترم نفسك ومهتم بالتفاصيل.
2- لغة الجسد = أول رسالة بتوصل بدون ما تتكلم
الجسم بيتكلم قبل ما صوتك يوصل! كل حركة بتعملها بتقول حاجة عنك:حافظ على تواصل بصري Eye Contact كويس من غير ما تبقى محرج أو تبصل في الأرض.
لو هتسلم، يبقى سلم بثقة، قبضة قوية لكن مش عنيفة.
اقعد بشكل مستقيم، ظهرك مفروض، وامتنع تمامًا عن التمايل على الكرسي أو التراخي.
بلاش تقاطع إيدك لأن ده بيدي إحساس بالرفض أو الدفاع.
خليك مبتسم طول الوقت بس بطريقة طبيعية، علشان تحسسه إنك إيجابي ومريح.
3- الذوق والاحترام هما سر الكاريزما
فيه تصرفات بسيطة لكنها ممكن تسيب انطباع رائع أو سيئ جدًا:استأذن قبل ما تقعد، حتى لو قالك "تفضل" بصوت واطي.
متحطش المفاتيح أو الموبايل على مكتبه، ده تصرف غير لائق وبيخلي شكلك "متملك" مش محترم للمكان.
لو صححلك معلومة، حتى لو هو غلط، متحرجوش ومتحاولش تثبت إنه غلط.
اسمع كويس، ماتقاطعش، وخلي عندك مرونة تقبل رأيه حتى لو مختلف عنك.
4- طريقة كلامك وتقديمك لنفسك
دي اللحظة اللي تقدر تلمع فيها فعليًا:قدم نفسك باختصار لكن بتركيز: عرفه مين أنت، دراستك، خبراتك، وإيه اللي ممكن تضيفه للمكان.
ركز على الحاجات اللي ليها علاقة بالوظيفة اللي مقدم عليها مش أي تفاصيل تكميلية.
احكي إنجازاتك بالأرقام أو النتائج الفعلية إن أمكن، زي "قدرت أزود المبيعات بنسبة 30%" أو "قللت معدل الأخطاء بنسبة 40%".
اتكلم بإيجابية عن شغلك أو مكانك السابق، بلاش تنتقد أو تشتكي.
5- إجاباتك على الأسئلة هي مفتاح شخصيتك
كل سؤال هو فرصة تظهر فيها مهاراتك وتفكيرك:حضر مواقف حقيقية حصلتلك تثبت بيها مهارة معينة، زي: "مرة كنت مضغوط في الشغل بس قدرت أنظم الوقت و..."
متلفش وتدور، اجاباتك لازم تكون صريحة وواضحة.
بلاش كذب خالص، لأن الأسئلة ساعات بتتكرر بشكل مختلف، وكدبك هيبان.
لو مش فاهم السؤال، اطلب إعادة بصيغة لطيفة زي: "ممكن توضحلي المقصود أكتر؟"
الخلاصة:
الـ HR مش بيدور بس على السيرة الذاتية، هو بيدور على شخص هيمثل الشركة، هيتعامل مع زمايله، وهيكون جزء من الفريق.لو قدرت تسيب انطباع إيجابي ومريح في أول 5 دقايق، فرصتك بتزيد جدًا في إنك تكمل للمراحل التالية من التقييم.
افتكر دايمًا:
الانطباع الأول ممكن يكون فرصتك الوحيدة.. فخليها لصالحك.
